Маңғыстау мұнайшылары киелі орында сенбілік өткізді

Тұщықұдық ауылы Қаламқас кен орнына жақын орналасқан елді мекен, сондықтан компанияның әлеуметтік жауапкершілігі аясында осы ауылға мүмкіндігінше жәрдемдесіп отыру жақсы үрдіске айналған. Осы жолғы мақсат - Маңғыстау өлкесіндегі мемлекетіміздің қорғауына алынған тарихи нысандардың бірі - Айдар-ишан мешітінің басында сенбілік өткізу.

Айдар-ишан (1848-1922), Бұқарада білім алып, ислам ұстанымдарын ұстанған діни қайраткер болған. Құдайға қызмет етуді және халықтың игілігі үшін халықтың діни сауаттылығын көтеруді өзінің парызы санаған ұстаз ретінде елге белгілі болған тұлға.

Жас мамандар Тұщықұдық ауылына келісімен С.Жанғабылов атындағы орта мектепке барып, мектеп мұражайын тамашалады. 90 жылдан астам тарихы бар мектепте көптеген елімізге белгілі мемлекет және қоғам қайраткерлері білім алған.

Ауыл тарихымен танысқан жас мұнайшылар Айдар-ишан мешітіне барып зиярат еткесін, сенбілікті бастап кетті. Мешіттің жанындағы руханият үйінің айналасын қоқыстардан тазартып, 20-дан астам жеміс ағаштарының көшеттерін отырғызды. Мешіт орналасқан қорымның қоршауын көтеруге де жәрдемдесіп, біраз жұмыстар атқарды.

Мешіт басындағы шырақшы Орынжан Рақметұлы көрсеткен көмектері үшін компания басшылығы мен сенбілікке қатысқан мұнайшыларға өз ризашылығын білдіріп, бата тілегін айтты.

Өткен аптада «Таза Қазақстан» республикалық экологиялық акциясы аясында Қарақия ойпатының тамашалау алаңының маңын қоқыстан тазартқан «Маңғыстаумұнайгаз» қызметкерлері келесі аптада Жас мамандар кеңесінің «Өз өлкеңді таны» жобасы шеңберінде Сисем-Ата қорымында сенбілік өткізбекші.